ജീവിതത്തോട് സമരം ചെയ്ത് സെലിന്‍

അങ്കമാലി: കറുകുറ്റി പാറോക്കാരന്‍ വീട്ടില്‍ സെലിന് ജീവിതം എന്നാല്‍ ഒരു സമരം തന്നെയാണ്. ഓടിക്കളിക്കേണ്ട നാലാം വയസ്സില്‍ തന്നെ പോളിയോ ബാധിതയായി ഇരു കാലുകള്‍ക്കും ചലന ശേഷി നഷ്ടപ്പെട്ടു. അതിനാല്‍ തന്നെ ആരും വിവാഹം കഴിക്കാന്‍ വന്നില്ലെന്ന് സെലിന്‍ പറയുന്നു. എന്നാല്‍ ഈയിടെ പഠിക്കണം എന്ന ആഗ്രഹത്താല്‍ സാക്ഷരത മിഷന്റ നാലാംക്ലാസ്സ് തുല്യത പരീക്ഷ എഴുതി വിജയിച്ചിരുന്നു. ജില്ല കളക്ടര്‍ രാജമാണിക്യത്തിന്റെ സാന്ത്വനം ക്യാമ്പില്‍ എത്തിയ അവസാനയാളായിരുന്നു സെലിന്‍, മുന്‍പേ കയറി കളക്ടറോട് സങ്കടം ബോധിപ്പിക്കാന്‍ അവസരം ഉണ്ടായിരുന്നെങ്കിലും ഊഴമനുസരിച്ച് കാത്തു നില്‍ക്കുകയായിരുന്നു. ഈയിടെ ഇവര്‍ക്ക് മുഖ്യമന്ത്രിയുടെ ജനസമ്പര്‍ക്ക പരിപാടി വഴി മുച്ചക്ര വാഹനം ലഭിച്ചിരുന്നു എന്നാല്‍ ഇത് വീട്ടിലെത്തിക്കാന്‍ സഞ്ചാര യോഗ്യമായ വഴി ഉണ്ടായിരുന്നില്ല. വഴി ലഭ്യമാക്കുന്നതിനു വേണ്ടിയാണ് ഇവര്‍ കളക്ടറെ കാണാനെത്തിയത്. ഇവരെ കാണാന്‍ സ്‌റ്റേജില്‍ നിന്നും താഴെയെത്തിയ കളക്ടര്‍ ഇവര്‍ക്കൊപ്പം നിലത്തിരുന്ന് പരാതി കേള്‍ക്കുകയും, ഇവര്‍ക്ക് മുച്ചക്ര വാഹനം വീട്ടിലെത്തിക്കാന്‍ വേണ്ട വഴി സജ്ജമാക്കണമെന്ന് കറുകുറ്റി ഗ്രാമപഞ്ചായത്ത് പ്രസിഡന്റിനും സെക്രട്ടറിക്കും നിര്‍ദ്ദേശം നല്കുകയും ചെയ്തു.