ജില്ലയിലെ റോഡുകളുടെ സ്്ഥിതിയും യോഗത്തില്‍ ചര്‍ച്ചവിഷയമായി. ഇന്‍ഫോപാര്‍ക്കിന്റെ ദുരവസ്ഥയുടെ പേരില്‍ തനിക്കു വന്ന ഫേസ്ബുക്ക് കമന്റും ജില്ല കളക്ടര്‍ യോഗത്തില്‍ അറിയിച്ചു. എന്നാല്‍ റോഡിന്റെ അറ്റകുറ്റപ്പണി സംബന്ധിച്ച് ടെന്‍ഡര്‍ കമ്മിറ്റിയുടെ അംഗീകാരം ലഭിക്കാത്തതു മൂലമാണു പണി വൈകുന്നതെന്നു പൊതുമരാമത്തുവകുപ്പ് നിരത്തു വിഭാഗം എക്‌സിക്യൂട്ടീവ് എന്‍ജിനീയര്‍ അറിയിച്ചു. അതേസമയം ടാറിംഗ് പൂര്‍ത്തിയാക്കിയ റോഡ് പിന്നീട് ജലവിഭവ വകുപ്പ് കുത്തിപ്പൊളിക്കുന്ന പ്രവണതയെ ജില്ലാ കളക്ടര്‍ വിമര്‍ശിച്ചു. ഇരുകൂട്ടരും തമ്മില്‍ പരസ്പര ധാരണയോടെ പ്രവര്‍ത്തിച്ചു മാത്രമേ തീരുമാനമെടുക്കാവൂ എന്ന് അദ്ദേഹം നിര്‍ദേശിച്ചു.
അങ്കമാലി മണ്ഡലത്തിലെ മിക്ക റോഡുകളുടെയും സ്ഥിതി വളരെ മോശമാണെന്നു ജോസ് തെറ്റയില്‍ എം എല്‍ എ പറഞ്ഞു. മണ്‍സൂണിനു മുമ്പുള്ള അറ്റകുറ്റപ്പണി വേണ്ടവിധം നടത്താത്തതാണ് ഇതിനു കാരണമെന്ന് അദ്ദേഹം പറഞ്ഞു. കാട്ടാനശല്യം തടയുന്നതിന്റെ ഭാഗമായി ജനാധിവാസ കേന്ദ്രങ്ങളോടു ചേര്‍ന്നു മുള്ളുവേലി നിര്‍മിക്കുന്നതിനുള്ള നടപടികള്‍ പുരോഗമിക്കുകയാണെന്നു വനംവകുപ്പ് അധികൃതര്‍ യോഗത്തില്‍ അറിയിച്ചു. എന്നാല്‍ മാമലക്കണ്ടം പോലെയുള്ള ഭാഗങ്ങളില്‍ കാട്ടാനകള്‍ നാട്ടിലിറങ്ങി കൃഷിയും മറ്റും വന്‍തോതില്‍ നശിപ്പിക്കുകയാണെന്നു ടി യു കുരുവിള എംഎല്‍എ വ്യക്തമാക്കി.
നബാര്‍ഡിന്റെ സഹായത്തോടെ ജില്ലയിലെ 34 അംഗന്‍വാടികള്‍ക്കു പുതിയ കെട്ടിടം നിര്‍മിക്കുന്നതിനുള്ള നടപടികള്‍ പൂര്‍ത്തിയായി വരുകയാണ്. എന്നാല്‍ തിരുമാറാടി, ശ്രീമൂലനഗരം എന്നിവിടങ്ങളില്‍ അംഗന്‍വാടികള്‍ക്കു കെട്ടിടം നിര്‍മിക്കാന്‍ പഞ്ചായത്തുവിഹിതം തികയില്ലാത്തതിനാല്‍ ഉപേക്ഷിക്കേണ്ട സ്ഥിതിയാണെന്നു സാമൂഹ്യനീതി വകുപ്പ് അറിയിച്ചു. ഭൂമിയുടെ സ്ഥിതിയും ഉയര്‍ന്ന വിലയുമാണു പ്രശ്‌നമായിരിക്കുന്നത്. ഇവിടങ്ങളില്‍ പകരം ഭൂമിയുടെ സാധ്യത പരിശോധിക്കാന്‍ യോഗം തീരുമാനിച്ചു.
മഞ്ഞുമ്മലിനു രാത്രി ആറുമണിക്കു ശേഷം സ്വകാര്യ ബസ് സര്‍വീസ് നടത്താന്‍ കൂട്ടാക്കുന്നില്ലെന്ന പരാതി പരിശോധിക്കാന്‍ ജില്ല കളക്ടര്‍ ആര്‍ടിഒയ്ക്ക് നിര്‍ദേശം നല്‍കി. വേണ്ടിവന്നാല്‍ ബസിന്റെ പെര്‍മിറ്റ് റദ്ദാക്കുന്നത് ഉള്‍പ്പെടെയുള്ള നടപടികള്‍ സ്വീകരിക്കണം. ഫോര്‍ട്ട് കൊച്ചി, വൈപ്പിന്‍ മേഖലകളിലും സമാന സ്ഥിതി വിശേഷമുണ്ടെന്നു യോഗത്തില്‍ പരാമര്‍ശിക്കപ്പെട്ടു. കളക്ടറേറ്റ് പരിസരത്തെ ഉപയോഗ ശൂന്യമായ ടെലിഫോണ്‍ കേബിളുകള്‍ മുറിച്ചുമാറ്റി വെള്ളക്കെട്ട് ഒഴിവാക്കാന്‍ പൊതുമരാമത്തു വകുപ്പിന് നിര്‍ദേശം നല്‍കിയിട്ടുണ്ട്.
കാക്കനാട് വരെയുള്ള ബസുകള്‍ ഇന്‍ഫോപാര്‍ക്ക് വരെ നീട്ടുന്നതിന് സാധ്യതകള്‍ പരിശോധിച്ചുവരുകയാണെന്നു ആര്‍ ടി ഒ അധികൃതര്‍ അറിയിച്ചു. പള്ളിക്കര വഴി പുതിയ ലോ ഫ്‌ളോര്‍ ബസ് സര്‍വീസ് ആരംഭിച്ചുകഴിഞ്ഞു. റോഡ് പൂര്‍ത്തിയാകാത്തതു ബസ് സര്‍വീസിന് തടസമായിട്ടുണ്ട്. വഴിയരുകില്‍ വില്ക്കുന്ന കുലുക്കി സര്‍ബത്തിന്റെ പരിശോധനയും വെളിച്ചെണ്ണയില്‍ മായം കലര്‍ത്തുന്നതിനെതിരെയും നടപടികള്‍ ശക്തമാക്കാന്‍ ഭക്ഷ്യ സുരക്ഷാവിഭാഗത്തിനു നിര്‍ദേശം നല്‍കി.
പെരുമ്പാവൂരില്‍ നിന്ന് ഒരു രക്ഷാകര്‍ത്താവ് തനിക്ക് അയച്ച പരാതി ജില്ലാ കളക്ടര്‍ കെഎസ്ആര്‍ടിസി അധികൃതര്‍ക്ക് കൈമാറി. ആകെയുള്ള ഒരു ബസ് ഇടയ്ക്കിടെ സര്‍വീസ് മുടക്കുന്നതു തന്റെ മകളുടെ പഠിത്തത്തെ ബാധിക്കുന്നുവെന്നായിരുന്നു രക്ഷിതാവിന്റെ പരാതി. ജനങ്ങളെ ബുദ്ധിമുട്ടിക്കുന്ന തരത്തില്‍ ബസ് സര്‍വീസ് മുടക്കരുതെന്ന് കളക്ടര്‍ നിര്‍ദേശിച്ചു. എന്നാല്‍ സിറ്റി സര്‍വീസിനായി കൂടുതല്‍ ബസുകള്‍ മാറ്റുമ്പോഴാണു നാട്ടിന്‍പുറങ്ങളിലൂടെയുള്ള സര്‍വീസുകള്‍ പലപ്പോഴും മുടങ്ങുന്നതെന്നു കെഎസ്ആര്‍ടിസി പ്രതിനിധി അറിയിച്ചു.
സീപോര്‍ട്ട്- എയര്‍പോര്‍ട്ട് റോഡില്‍ ഒലിമുകള്‍ ജംഗ്ഷനില്‍ ട്രാഫിക് സിഗ്‌നലിന്റെ കാര്യത്തിലെ അപാകത പരിഹരിക്കുന്നതിനും ഈ റോഡ് ഒഴികെ വന്നുചേരുന്ന മറ്റു റോഡുകളില്‍ ഹമ്പ് നിര്‍മിക്കാന്‍ നടപടിയെടുക്കാനും വേണ്ടത്ര ട്രാഫിക് വാര്‍ഡന്‍മാരെ നിയോഗിക്കാനും തൃക്കാക്കര പോലീസ് അസി. കമ്മീഷണര്‍ ബിജോ അലക്‌സാണ്ടര്‍ക്ക് ജില്ല കളക്ടര്‍ നിര്‍ദേശം നല്‍കി. പതിനെട്ടു വയസിനു താഴെയുള്ളവര്‍ ബസുകള്‍ ഓടിക്കുന്നതായി ശ്രദ്ധയില്‍പ്പെട്ടിട്ടുണ്ടെന്നും അതിനെതിരേ നടപടി സ്വീകരിക്കാനും യോഗത്തില്‍ തീരുമാനമായി. ഇക്കാര്യത്തില്‍ മോട്ടോര്‍ വാഹന വകുപ്പും പോലീസും കര്‍ശന നടപടിയെടുക്കണം. ജില്ലയില്‍ പ്രധാന റോഡുകളില്‍ സീബ്രാലൈനുകള്‍ വേണ്ടിടത്ത് അവ അടിയന്തിരമായി വരയ്ക്കാന്‍ പോലീസിനോടു നിര്‍ദേശിച്ചു.
നടക്കാവ് ജംഗ്ഷനില്‍ ട്രാഫിക് സിംഗ്‌നൈല്‍ ലൈറ്റിനുള്ള നിര്‍ദേശം തയാറാക്കി അതു നിര്‍മിക്കാന്‍ തയാറായി മുന്നോട്ടുവന്നിട്ടുളള ഇന്ത്യന്‍ ഓയില്‍ കോര്‍പറേഷനു കൈമാറണം. കോട്ടയത്തെ കുമരകത്തു നിന്ന് കടുത്തുരുത്തി വഴി നെടുമ്പാശേരിക്കു സംസ്ഥാന പാത നിര്‍മിക്കണമെന്ന പ്രമേയം സര്‍ക്കാരിനു മുന്നില്‍ അവതരിപ്പിക്കുന്നതിനു യോഗം അനുമതി നല്‍കി.
അങ്കമാലി ആശുപത്രിയിലെ ജീവനക്കാരുടെ എണ്ണത്തിന്റെ കാര്യത്തില്‍ ഉദ്യോഗസ്്ഥര്‍ തെറ്റിദ്ധാരണ സൃഷ്ടിക്കുകയാണെന്നു ജോസ് തെറ്റയില്‍ എം എല്‍ എ കുറ്റപ്പെടുത്തി. ഇവിടെ ഒപിയില്‍ അറുനൂറോളം രോഗികള്‍ എത്തുന്നുണ്ടെങ്കിലും വേണ്ടത്ര ഡോക്ടര്‍മാരും മറ്റ് ജീവനക്കാരുമില്ലെന്ന് മുനിസിപ്പല്‍ ചെയര്‍മാന്‍ ബെന്നി മുഞ്ഞേലിയും പറഞ്ഞു. ഇടമലയാര്‍ ഇറിഗേഷന്‍ ഡൈവേര്‍ഷന്‍ പദ്ധതി സംബന്ധിച്ച് റിപ്പോര്‍ട്ട് സമര്‍പ്പിക്കാന്‍ സര്‍വെ, ഇറിഗേഷന്‍ വകുപ്പുകള്‍ക്കു നിര്‍ദേശം നല്‍കി. മഞ്ഞപ്ര- അയ്യമ്പുഴ റോഡ് നിര്‍മാണം സംബന്ധിച്ച് നടപടികള്‍ സ്വീകരിക്കാന്‍ ജോസ് തെറ്റയില്‍ എംഎല്‍എ ആവശ്യപ്പെട്ടു. തനിക്കു ഫേസ്ബുക്കിലൂടെയും വാട്‌സ് ആപ്പിലൂടെയും ലഭിക്കുന്ന പരാതികള്‍ ബന്ധപ്പെട്ട വകുപ്പുകള്‍ക്കു കൈമാറുമെന്നും ഇക്കാര്യത്തില്‍ നടപടികള്‍ സ്വീകരിക്കണമെന്നും ജില്ലാ കളക്ടര്‍ എം. ജി. രാജമാണിക്യം അറിയിച്ചു.
അപകടത്തിൽപ്പെട്ട യുവാവിന് രക്ഷകനായി വി ഡി സതീശൻ; പൈലറ്റ് വാഹനത്തിൽ ആശുപത്രിയിലെത്തിച്ചു
കാലിഫോർണിയയിൽ കൊല്ലപ്പെട്ട മലയാളി യുവതികളുടെ മൃതദേഹങ്ങൾ 21ന് നാട്ടിലെത്തിക്കും