വന്‍ ഭീകരാക്രമണ പദ്ധതികള്‍ തകര്‍ത്തു.

മനാമ : പള്ളികളില്‍ ചാവേര്‍ ആക്രമണങ്ങള്‍ക്ക് പദ്ധതയിട്ട ഐഎസ് ഭീകര സെല്ലുകളെ സൗദി അറേബ്യ തകര്‍ത്തു. 431 ഐഎസ് ഭീകരരരെ ആയുധങ്ങളുമായി അറസ്റ്റു ചെയ്തു. വിവിധ തരം തോക്കുകള്‍, മറ്റു ആയുധങ്ങള്‍, ലാപ്ടോപ്പുകള്‍, ഫോണുകള്‍ തുടങ്ങിയവ ഇവരില്‍നിന്നും കണ്ടെടുത്തു. കിഴക്കന്‍ പ്രവിശ്യയിലെ അല്‍ ഖദീഹിലും ദമാമിലും 27 പേരുടെ മരണത്തിനിടയാക്കിയ പള്ളികളിലെ ചാവേര്‍ ആക്രമണത്തിലെ പ്രതികളും പിടിയിലായവില്‍ ഉള്‍പ്പെടും. റമദാനില്‍ ഭീകരാക്രമണങ്ങള്‍ നടത്താനുള്ള ഭീകരരുടെ പദ്ധതികള്‍ തകര്‍ത്തതായി ആഭ്യന്തര മന്ത്രാലയം വക്താവ് മന്‍സൂര്‍ അല്‍ തുര്‍ക്കി അറിയിച്ചു. എല്ലാ വെള്ളിയാഴ്ചകളിലും കിഴക്കന്‍ പ്രവിശ്യകളിലെ ഷിയാ പള്ളികളിലായി ആറ് ചാവേര്‍ ബോംബാക്രമണത്തിന് ഈ സംഘം പദ്ധതിയിട്ടു. രാജ്യത്തെ ഒരു നയതന്ത്ര കാര്യാലയത്തിനും നജ്റാനിലെ ഷരൂരയില്‍ സുരക്ഷ, സര്‍ക്കാര്‍ സ്ഥാപനങ്ങളെയും ആക്രമിക്കാനും സുരക്ഷാ സൈനികരെ അപായപ്പെടുത്താനും റിയാദില്‍ സുരക്ഷാ സൈനികരുടെ പള്ളിയില്‍ ചാവേര്‍ ആക്രമണത്തിനും ഭീകരര്‍ പദ്ധതി തയ്യാറാക്കിയിരുന്നു. അഞ്ച് അംഗങ്ങള്‍ വീതമുള്ള വിവിധ സെല്ലുകളായായിരുന്നു സംഘത്തിന്റെ പ്രവര്‍ത്തനം. ഒരു സെല്ലിന് ചാവേറുകളെ തയ്യാറാക്കുകയായിരുന്നു ജോലി. മറ്റൊരു സെല്ലിന് സ്ഫോടക വസ്തുക്കള്‍ നിറച്ച ബെല്‍റ്റ് ബോംബ് നിര്‍മ്മിക്കലും. ഈ സെല്ലുകളിലെ അംഗങ്ങള്‍ക്ക് പരസ്പരം ബന്ധപ്പെടാന്‍ അനുവാദമില്ല. കഴിഞ്ഞ ഒന്നര മാസമായി രാജ്യ വ്യാപകമായി നടത്തിയ ഓപ്പറേഷനിലാണ് ഭീകരര്‍ പിടിയിലായത്. അറസ്റ്റിലായവരില്‍ ഭൂരിഭാഗവും സൗദികളാണ്. യെമന്‍, ഈജിപ്ത്, സിറിയ, ജോര്‍ദ്ദാന്‍, അള്‍ജീരിയ, നൈജീരിയ, ചാഡ് എന്നിവടങ്ങളില്‍നിന്നുള്ളവരുമുണ്ട്. കിഴക്കന്‍ പ്രവിശ്യയിലെ രണ്ടു പള്ളി ബോംബാക്രമണങ്ങളിലെ പ്രതികളാണ് ഇതിലെ 190 പേര്‍. അല്‍ ഹസയില്‍ കഴിഞ്ഞ വര്‍ഷം നവംബറില്‍ 4 പേരെ വെടിവെച്ചു കൊന്ന പ്രതികളും ഇതില്‍ ഉള്‍പ്പെടും. സംഘത്തിലേക്ക് ആളെ റിക്രൂട്ട് ചെയ്യാന്‍ വെബ്സൈറ്റ് നിര്‍മ്മിച്ചവരെയും പിടികൂടി. വ്യാഴാഴ്ച രാത്രി റിയാദില്‍ ഭീകരരെ താമസിപ്പിക്കുന്ന ഹായര്‍ ജെയിലിനു സമീപം സെക്യൂരിറ്റി ചെക്ക്പോയിന്റില്‍ ചാവേര്‍ പൊട്ടിത്തെറിച്ചിരുന്നു. ഇതിനുപിന്നാലെയാണ് ഭീകരരെ പിടികൂടിയ വിവരം മന്ത്രാലയം വെളിപ്പെടുത്തിയത്.