2015ല്‍ വാഹന പ്രേമികള്‍ ഏറെ കാത്തിരുന്ന മോഡലാണ് ഹോണ്ട ജാസ്. മൂല്യവര്‍ദ്ധിത കാറുകള്‍ (പ്രീമിയം എന്ന് ഇംഗ്ളീഷില്‍) അരങ്ങുവാഴാന്‍ തുടങ്ങിയതുമുതല്‍ ശ്രദ്ധാ കേന്ദ്രമായിരുന്നു ജാസ്. നിലവാരവും കരുത്തും വര്‍ദ്ധിപ്പിച്ച് എത്തുന്ന ഹാച്ച്ബാക്കുകളാണ് ഇപ്പോഴത്തെ താരങ്ങള്‍. i20 എലൈറ്റ്, ഫോക്സ്വാഗണ്‍ പോളോ എന്നിവ ഇങ്ങിനെ നേരത്തെ ആഡ്യന്മാരായി. ഇവരോടേറ്റുമുട്ടി തളര്‍ന്നിരിക്കുകയാണ് ഇന്ത്യന്‍ ഹാച്ചുകളിലെ രാജാവായ സ്വഫ്റ്റ്. ഇപ്പോഴിതാ ജാസും അവതരിച്ചിരിക്കുന്നു. ജാസിനൊരു ചരിത്രമുണ്ട്. 2009ലാണ് ഹോണ്ട തങ്ങളുടെ പ്രിയ കുട്ടിയെ ആദ്യമായി അവതരിപ്പിച്ചത്. ഏഴ് ലക്ഷത്തിന് മുകളിലായിരുന്നു വില. നിലവാരമുയര്‍ന്ന ഡിക്കിയില്ലാ കാറുകള്‍ക്കിടയില്‍ ഏറെ ശ്രദ്ധേയനായിരുന്നു ആദ്യ വരവില്‍ ജാസ്. പക്ഷെ വിലക്കൂടുതലും പെട്രോള്‍ വിഭാഗം മാത്രമുള്ളതും തിരിച്ചടിയായി. 2011ല്‍ പരിഷ്കരിച്ചും വില കുറച്ചും വീണ്ടുമത്തെിയെങ്കിലും സാമാന്യ വില്‍പ്പന പോലും കൈവരിക്കാന്‍ കഴിഞ്ഞില്ല. പിന്നീട് ഹോണ്ട ഏറെ മാറി. ഒപ്പം അവരുടെ മോഡലുകളും. പെട്രോള്‍ കടുംപിടിത്തങ്ങള്‍ ഉപേക്ഷിച്ച് ഡീസലിന്‍െറ ജനപ്രിയതയിലേക്കുള്ള മാറ്റമാണിതില്‍ പ്രധാനം. പുതിയ ജാസ് വരുമ്പോള്‍ പ്രതീക്ഷയുടെ മാപിനികള്‍ ഉയരുകയാണ്. വാഹന പ്രേമികളുടേയും ഹോണ്ടയുടേയും.
അഴകന്‍
അഴകളവുകളില്‍ ജാസൊരു തികഞ്ഞവനാണ്. ഹ്യൂണ്ടായുടെ i20 എലൈറ്റിന് തക്ക എതിരാളി. സിറ്റിയെ അനുസ്മരിപ്പിക്കുന്ന ഹെഡ്ലൈറ്റുകള്‍, കറുപ്പിന് പ്രാധാന്യമുള്ള ഗ്രില്ല് എന്നിവ ആകര്‍ഷകം. വിഭജിക്കപ്പെടാത്ത ഉരുണ്ട ഒറ്റ ശരീരമാണ് വാഹനത്തിനെങ്കിലും ചതുര വടിവുകള്‍ വരഞ്ഞിട്ടിരിക്കുന്നത് ഭംഗിയേറ്റും. പുത്തന്‍ ബെന്‍സ് സി ക്ളാസിനെ എവിടെയൊക്കെയോ അനുസ്മരിപ്പിക്കുന്ന മുന്‍ ബമ്പറില്‍ ഫോഗ് ലാമ്പുകള്‍ പിടിപ്പിച്ചിരിക്കുന്നു. മുന്‍വശത്ത് ക്രോമിയത്തിന്‍െറ ധാരാളിത്തം ഇല്ല എന്നതും പ്രത്യേകതയാണ്. വശങ്ങളില്‍ നിന്ന് നോക്കിയാല്‍ മുന്‍ ഡോറില്‍ തുടങ്ങി ടെയില്‍ ലൈറ്റുകളില്‍ അവസാനിക്കുന്ന നീണ്ട വ്യക്തമായ ക്യാരക്ടര്‍ ലൈന്‍ കാണാം. പുത്തന്‍ അലോയ് വീലുകളും ആകര്‍ഷകം. ഡി ടെയില്‍ ലൈറ്റുകള്‍. ഇവ അല്‍പ്പം നീണ്ട് ബമ്പറിലേക്ക് വളര്‍ന്നിറങ്ങിയിരിക്കുന്നു. വലിയ ക്രോം ബാര്‍, വൈപ്പര്‍, ആന്റിന എന്നിവയും ആകര്‍ഷകം.
വായനക്കാർക്കായി / Recommended for You
അപകടത്തിൽപ്പെട്ട യുവാവിന് രക്ഷകനായി വി ഡി സതീശൻ; പൈലറ്റ് വാഹനത്തിൽ ആശുപത്രിയിലെത്തിച്ചു
കാലിഫോർണിയയിൽ കൊല്ലപ്പെട്ട മലയാളി യുവതികളുടെ മൃതദേഹങ്ങൾ 21ന് നാട്ടിലെത്തിക്കും