തിരുവനന്തപുരം : തിരക്കുള്ള സമയത്ത് സംസ്ഥാനത്തെ റോഡുകളില്‍ വാഹനപരിശോധന ഒഴിവാക്കുമെന്ന് ആഭ്യന്തര മന്ത്രി രമേശ് ചെന്നിത്തല പറഞ്ഞു. ഇതുമായി ബന്ധപ്പെട്ട് പൊലീസിന് നിര്‍ദേശം നല്‍കിയെന്നും അദ്ദേഹം പറഞ്ഞു. പൊലീസിന്റെ വാഹനപരിശോധനയ്ക്കിടെ തൃശൂരിലുണ്ടായ അപകടത്തിന്റെ പശ്ചാത്തലത്തിലാണ് തീരുമാനം.
ഇന്നുരാവിലെ മണ്ണുത്തിക്കടുത്ത് വെട്ടിക്കലില്‍ കെഎസ്ആര്‍ടിസി ബസ്, ബൈക്കിലിടിച്ചു അമ്മയും കുഞ്ഞും മരിച്ചിരുന്നു. തൃശൂര്‍ പാലക്കാട് ദേശീയപാതയില്‍ പൊലീസിന്റെ വാഹന പരിശോധനയ്ക്കിടെയാണ് അപകടമുണ്ടായത്. പരിശോധിച്ചുകൊണ്ടിരുന്ന വാഹനത്തെ ഓവര്‍ടേക്ക് ചെയ്ത് ബൈക്ക് മുന്നോട്ടുപോയപ്പോള്‍ എതിരെ വന്ന ബസ് ബൈക്കില്‍ ഇടിക്കുകയായിരുന്നു. അപകടത്തില്‍ യുവതിയും മകളും മരിച്ചു.
നിരന്തരം അപകടങ്ങള്‍ ഉണ്ടാകാറുള്ള സ്ഥലത്ത് വാഹനപരിശോധന നടത്തി അപകടം വിളിച്ചുവരുത്തിയ പൊലീസിനെതിരെ നാട്ടുകാര്‍ സംഘടിച്ചു. ഇതോടെ ഹൈവേ പൊലീസ് രക്ഷാപ്രവര്‍ത്തനത്തിനുപോലും നില്‍ക്കാതെ സ്ഥലംവിടുകയും ചെയ്തു. സംഭവം വിവാദമായതോടെയാണ് ആഭ്യന്തരമന്ത്രിയുടെ നടപടി.
വായനക്കാർക്കായി / Recommended for You
അപകടത്തിൽപ്പെട്ട യുവാവിന് രക്ഷകനായി വി ഡി സതീശൻ; പൈലറ്റ് വാഹനത്തിൽ ആശുപത്രിയിലെത്തിച്ചു
കാലിഫോർണിയയിൽ കൊല്ലപ്പെട്ട മലയാളി യുവതികളുടെ മൃതദേഹങ്ങൾ 21ന് നാട്ടിലെത്തിക്കും