ഇറാനെതിരായ ആക്രമണം താത്ക്കാലികമായി ഒഴിവാക്കി ട്രംപ്; കരാറിന് മുന്നില്‍ വെച്ച് ഉപാധികള്‍ പ്രഖ്യാപിച്ചു

ഇറാനുമായുള്ള ഏത് കരാറിലും ഹോര്‍മുസ് കടലിടുക്ക് പൂര്‍ണമായും തുറക്കുകയും ഇറാന്റെ ആണവ ഭീഷണി അവസാനിപ്പിക്കുകയും വേണം എന്ന് ട്രംപ് വ്യക്തമാക്കി.

ലോകത്തിന്റെ ഭാവി താത്പര്യത്തിനും സമാധാനത്തിനും അതുപോലെ തന്നെ വിജയകരവും സമൃദ്ധവുമായ ഇറാന്റെ നിലനില്‍പ്പിനുമായി ആക്രമണം റദ്ദാക്കാന്‍ താന്‍ സമ്മതിച്ചുവെന്നും എന്നാല്‍ അതിന് വേഗത്തില്‍ ഒരു കരാറിലെത്തണമെന്നും ട്രംപ് പറഞ്ഞു. ഇസ്രയേലും ഈ തീരുമാനത്തില്‍ പങ്കുചേരുന്നതായി ട്രംപ് അറിയിച്ചു.

ട്രംപ് ഇറാനെതിരെ കൂടുതല്‍ ആക്രമണങ്ങള്‍ നടത്തുമെന്ന് മുമ്പ് ഭീഷണി മുഴക്കിയിരുന്നു.

അതേസമയം, അമേരിക്കയുടെ ഏത് ആക്രമണത്തിനും 'നിര്‍ണായകമായ മറുപടി നല്‍കാന്‍' ഇറാന്‍ തയ്യാറാണെന്ന് ഇറാന്‍ വിദേശകാര്യ മന്ത്രി അബ്ബാസ് അറാഖ്ചി മുന്നറിയിപ്പ് നല്‍കി.

പാകിസ്ഥാന്‍ സൈനിക മേധാവിയുമായും തുര്‍ക്കി വിദേശകാര്യ മന്ത്രി ഹകാന്‍ ഫിദാനുമായും നടത്തിയ പ്രത്യേക ഫോണ്‍ സംഭാഷണങ്ങളില്‍ മേഖലയിലെ വര്‍ധിച്ചുവരുന്ന സംഘര്‍ഷാവസ്ഥ ചര്‍ച്ച ചെയ്തതായി ഇറാന്‍ അറിയിച്ചു.

അമേരിക്കയുടെ നടപടികള്‍ മേഖലയില്‍ അസ്ഥിരത സൃഷ്ടിക്കുന്നതാണെന്ന് ആരോപിച്ച അറാഖ്ചി, ഇറാന്‍ സ്വന്തം പരമാധികാരം, ഭൗമ അഖണ്ഡത, ദേശീയ സുരക്ഷ എന്നിവ സംരക്ഷിക്കാന്‍ തയ്യാറാണെന്ന് ആവര്‍ത്തിച്ചു.